Viva-ն հյուրընկալել է դոկտոր Յոշիակի Դեյմոն Հագիվարային

Ճապոնիայից Հայաստան ժամանած, Բարձր տեխնոլոգիաների ոլորտում համաշխարհային ներդրման համար շնորհվող պետական մրցանակի՝ 2024 թվականի դափնեկիր դոկտոր Յոշիակի Դեյմոն Հագիվարան ներկայացրել է մասնագիտական հարուստ փորձը եւ հաջողության իր ճանապարհը:

Նա AIPLAB (ԷյԱյՓի ԼԱԲ) կոնսորցիումի հիմնադիր եւ արհեստական բանականության գործընկերային համակարգ հանդիսացող՝ LOCOMTEC (ԼոքոմԹեք) լաբորատորիայի նախագահն է։

27 տարեկանում ֆիզիկայի ոլորտում դոկտորի կոչում ստացած, հետագա կյանքը գիտությանը նվիրած եւ բարձր տեխնոլոգիաների ոլորտում կարեւոր փոփոխություններ կատարած Յոշիակի Դեյմոն Հագիվարան Հայաստանում է՝ աշխարհում արդեն որոշակի հնչեղություն ստացած եւ հեղինակություն վայելող մրցանակաբաշխության շնորհիվ:

«Իմ ընտանիքի համար արտառոց երեւույթ է արտերկիր մեկնելը: Հայաստանում այցելել ենք տաճարներ, թանգարաններ, ծանոթացել ենք ձեր հին մշակույթին: Մշտապես կարեւորում եմ միջմշակութային շփումները, տարբեր ազգերի մշակույթներին առնչվելն ու լավագույնը վերցնելը: Անընդհատ սովորելը կենսակերպ է եղել՝ լինի օտար լեզու, թե մասնագիտական գիտելիք: Նորարար տեխնոլոգիաների հանդեպ հետաքրքրությունը սկիզբ է առել մուլտֆիլմերից»,- նշել է դոկտոր Հագիվարան։

Անդրադառնալով Viva-ին որպես ՏՀՏ ոլորտում առաջատար ընկերության՝ Global High-Tech-ի 15-րդ դափնեկիրը ներկայացրել է իր կարգախոսը՝ ձգտել ավելիին ու երբեք չհանձնվել:

«15 տարի մենք հարգանքի ու շնորհակալության խոսք ենք ուղղում մարդկանց, որոնք մեծ ներդրում են ունեցել տեխնոլոգիաների աշխարհում։ Մյուս կողմից՝ 15 տարի անընդմեջ թիմն աշխատում է, որպեսի նրանց ու նրանց գործը ճանաչելի դարձնի Հայաստանում։ Տարիների այս աշխատանքը երազանքի ու այդ երազանքն իրականություն դարձնելու մասին է։ Մենք ցանկանում ենք Հայաստանը դարձնել տեխնոլոգիական հաբ, տաղանդների հաբ։ Այս ճանապարհը, որ մենք անցնում ենք, դա մի քանի տարվա ճանապարհ չէ, դա 15 եւ ավելի տարվա քրտնաջան աշխատանք է պահանջում», - ասել է Բարձր տեխնոլոգիական արդյունաբերության նախարարի տեղակալ Ռուբեն Սիմոնյանը:

«Կան իրադարձություններ, որոնց թողած երկարաժամկետ ազդեցությունը դժվար է գնահատել մեկ ասուլիսի շրջանակում: Արդեն 15 տարի անընդմեջ պատիվ ունենք Viva-ի այս դահլիճում ընդունելու Global High-Tech-ի դափնեկիրներին: Սա ոչ թե ուղղակի մրցանակաբաշխություն է, այլեւ՝ բարձր տեխնոլոգիաների ոլորտում ներդրված ահռելի փորձի ներկայացում: Դափնեկիրներից յուրաքանչյուրի անցած ուղին խելացի ապագա կառուցելու յուրօրինակ ուղեցույց է՝ աշխարհի բոլոր երկրների համար։ Դոկտոր Հագիվարա, ողջունում ենք Ձեզ՝ այս այցն ընդունելով որպես կարեւոր պատգամ. նպաստել ՏՏ ոլորտում առկա ներուժի շարունակական բացահայտմանը, այս ոլորտում մեր երկրի՝ արդեն իսկ ձեռք բերած վարկանիշի բարձրացմանը, գնահատել կայուն կապիտալի՝ գիտելիքի դերը եւ հետեւողական քայլերով շարժվել աշխարհի զարգացման տեմպին համընթաց՝ փորձելով գերազանցել այն», - նշել է Viva-ի գլխավոր տնօրեն Արմեն Ավետիսյանը:

15 տարի շարունակ Global High-Tech պետական մրցանակի նախաձեռնողն ու աջակիցը՝ «Սինոփսիս Արմենիա» ընկերությունն է:

««Սինոփսիս» ընկերությունը Հայաստանում ցույց է տվել իր հանձնառությունը՝ խթանելու նորարարությունները ինչպես գլոբալ համագործակցության, այնպես էլ ճարտարագետների հաջորդ սերնդի մեջ ներդրումներ կատարելու միջոցով: Մեզ համար պատիվ է շարունակել աջակցել «Բարձր տեխնոլոգիաների ոլորտում համաշխարհային ներդրման համար ՀՀ պետական մրցանակի ծրագրին, ինչպես նաեւ մեր մյուս ծրագրերին, ինչպիսիք են ՏՏ ոլորտի կրթական պարգեւը եւ Միջազգային միկրոէլեկտրոնիկայի օլիմպիադան», - ասել է «Սինոփսիս Արմենիա»-ի տնօրեն եւ մրցանակաբաշխության գործադիր խորհրդի նախագահ Հովիկ Մուսայելյանը:

Որպես Global High-Tech մրցանակաբաշխության գլխավոր գործընկեր՝ Viva-ն 15 տարվա ընթացքում հատկացրել է ավելի քան 297 մլն դրամ:

15 տարվա ընթացքում Global High-Tech մրցանակաբաշխության շրջանակում Հայաստան են այցելել այնպիսի գիտնականներ, ինչպիսիք են «Intel» /«Ինտել»/ կորպորացիայի գլխավոր գործադիր տնօրեն եւ նախագահ Քրեյգ Ռ. Բարեթը (2010), Կիսահաղորդչային արդյունաբերության մասնագետների միության նախագահ, «Hitachi» /«Հիտաչի»/ ընկերության նախկին գործադիր տնօրեն Ցուգիո Մակիմոտոն (2013), «Open-Root» /«Օուփեն ռութ»/ կազմակերպության գլխավոր տնօրեն, համացանցի առաջամարտիկներից մեկը՝ Լուի Պուզենը (2016), «Nest Labs» /«Նեսթ Լաբս» /ընկերության հիմնադիր, «iPod» /«այՓոդ»/ ապրանքանիշի հեղինակ Թոնի Ֆադելը (2017), «Adobe» /«Ադոբի»/ ընկերության նախագահ Շանթանու Նարայենը (2022), «Infosys» /«Ինֆոսիս»/ ընկերության հիմնադիր Նարայանա Մուրտին (2023) եւ այլք: