Orin AI-ը հասանելի ու հասկանալի է դարձնում օրենքները

Orin AI-ն աշխատում է պարզ սկզբունքով՝ օրենքը պետք է լինի հասանելի, հստակ եւ հասկանալի բոլորին։

Ռադիոֆիզիկոս Արամ Հարությունյանը, որը ղեկավարում է Լոյալ Հաշվապահական Գրասենյակն ու զբաղվում հարկային եւ իրավական խորհրդատվությամբ, ստեղծել է Orin AI չատբոտը՝ հայերենով իրավական հարցերին արագ եւ հստակ պատասխաններ տրամադրելու համար։

Itel.am-ի հետ զրույցում Orin AI-ի հիմնադիրը պատմել է ստարտափի ստեղծման, գաղափարի ու առաջիկա պլաններ մասին։

Գաղափարը

Ինձ համար օրենքներ կարդալը միշտ բարդ ու հոգնեցուցիչ պրոցես է եղել։ Թեեւ լավ եմ տիրապետում հարկային օրենսգրքին, այնուամենայնիվ ցանկացա մի գործիք ունենալ, որը կպարզեցներ ու կհեշտացներ այդ ամենը: Գաղափարը ձեւավորվել է մոտ երկու տարի առաջ, երբ AI գործիքները դեռ լայնորեն հասանելի չէին, իսկ հայերենով աշխատող մոդելներ գրեթե բացակայում էին:

Արամ Հարությունյանը
photo © Մեդիամաքս

2023-ի սկզբից սկսեցինք աշխատել պրոդուկտի տեխնիկական մշակման վրա։ Սկզբում արդյունքները հիասթափեցնող էին՝ «շատ վատ հայերենով» տարբերակ էինք ստացել, բայց վստահ էի՝ պետք է շարունակել։

2023-ի ամռանը զգալի առաջընթաց արձանագրեցինք։ Ներկայում Orin AI-ը արհեստական բանականությամբ օժտված չատբոտ է, որն իրավական հարցերին պատասխանում է գրագետ հայերենով՝ հղում տալով օրենսդրական հոդվածներին։

Ո՞ւմ համար է նախատեսված Orin AI-ը

Սկզբում պրոդուկտը նախատեսված էր մասնագետների՝ իրավաբանների, հաշվապահների, հարկային խորհրդատուների համար։ Գործիքը, սակայն, հետագայում գրավեց նաեւ ոչ մասնագիտական լսարանին։ Միայն LinkedIn-ում արած մեկ հրապարակման արդյունքում գրանցվեց շուրջ 700 օգտատեր, որից շատերը մասնագետ չէին։

Արամ Հարությունյանը
photo © Մեդիամաքս

Orin AI-ն աշխատում է բաժանորդագրության մոդելով՝ առաջարկելով տարբեր փաթեթներ։ Ամենատարածվածն առաջարկում է ամսական 50 հարցի հնարավորություն 3750 դրամի դիմաց։ Ավելի առաջադեմ՝ մասնագիտական տարբերակն առաջարկում է մինչեւ 200 հարց 13 000 դրամով։

Orin AI-ը նաեւ նախատեսում է ծառայություններ ընկերությունների համար՝ բիզնես փաթեթների միջոցով։ Դրանք ներառում են իրավական փոփոխությունների վերաբերյալ պարբերական թարմացումներ, ավտոմատ ծանուցումներ եւ այլ հավելյալ հնարավորություններ։

Orin AI հարթակը
photo © Մեդիամաքս

Orin AI-ն իրեն չի դիրքավորում որպես իրավական խորհրդատու։ Այն ուղղակի ներկայացնում է օրենքների բովանդակությունը՝ հնարավորինս պարզեցված։ Չատբոտին հարց եք տալիս, ինքը պատասխանում եւ հղում է տալիս օրենսդրությանը։ Ոչ թե ասում է՝ ինչ անել, այլ ներկայացնում է ըստ օրենքի՝ ինչ է նախատեսված։ Սա օգտատիրոջ տեղեկացված լինելու գործիք է։

Իրավական տեղեկատվություն՝ արագ թարմացվող եւ անվտանգ

Համակարգը թարմացվում է՝ ըստ կառավարության եւ Ազգային ժողովի նիստերի արդյունքների։ Որոշ դեպքերում Orin AI-ն ավելի արագ է թարմացվում, քան պաշտոնական իրավական պորտալները, օրինակ՝ Arlis.am-ը։

Արամ Հարությունյանը
photo © Մեդիամաքս

Հատուկ ուշադրություն է դարձվում նաեւ տվյալների անվտանգությանը։ Համակարգը պահպանում է հարցումները կարճ ժամանակով՝ միայն անհրաժեշտ վերլուծության նպատակով։ Մեզ մոտ 15 օրը մեկ ամբողջությամբ մաքրում ենք բազան։

Առայժմ միայն վեբ տարբերակով

Այս պահին գործիքը հասանելի է միայն վեբ տարբերակով։ Թեեւ բջջային օգտագործման համար հարմարեցված է, առանձին հավելված ունենալու անհրաժեշտություն դեռ չենք տեսնում։ Ապագայում հնարավոր է հավելյալ լուծումներ, եթե շուկան պահանջի։

Նունե Գրիգորյան
Լուսանկարները՝ Ագապե Գրիգորյանի