Ամփոփվել են ինժեներական բիզնես աքսելերատորի շենքի շինարարական աշխատանքները

ՀՀ բարձր տեխնոլոգիական արդյունաբերության նախարար Մխիթար Հայրապետյանն այցելել է «Ինժեներական քաղաք»՝ տեղում ծանոթանալու բիզնես աքսելերատորի շենքի շինարարական աշխատանքների ավարտին: 

Շրջայցին մասնակցել են նաեւ Հայաստանում Իրանի արտակարգ եւ լիազոր դեսպան Մեհդի Սոբհանին, շինարարական աշխատանքներն իրականացնող «Թունել Սադդ Արիանա» իրանական ընկերության ներկայացուցիչները, ինչպես նաեւ «Ինժեներական քաղաքի» ռեզիդենտները:

«Ձեռնարկությունների ինկուբատոր հիմնադրամի» տնօրեն Բագրատ Ենգիբարյանի ուղեկցությամբ Մխիթար Հայրապետյանը շրջել է նորակառույց շենքում, ծանոթացել շինարարական փուլերին, տարածքի ներքին կառուցվածքին եւ դրա նշանակությանը՝ որպես «Ինժեներական քաղաքի» կենտրոնական հանգույցներից մեկը: 

Շրջայցից հետո Բագրատ Ենգիբարյանը ներկայացրել է «Ինժեներական քաղաքի» գործունեության հիմնական ուղղությունները, ընթացիկ ծրագրերը, ինչպես նաեւ միջազգային եւ տեղական գործընկերների հետ համագործակցության շրջանակն ու զարգացմանն ուղղված քայլերը։ 

Ելույթով հանդես է եկել նաեւ նախարար Մխիթար Հայրապետյանը՝ ընդգծելով բիզնես աքսելերատորի շենքի դերը՝ որպես նորարական գաղափարների իրագործման եւ ինժեներական համայնքի ապագա հարթակ։

Դեսպան Սոբհանին, իր հերթին, կարեւորել է Իրանի եւ Հայաստանի միջեւ շարունակական համագործակցությունը, շնորհավորել է բիզնես աքսելերատորի շենքի կառուցման ավարտի առթիվ՝ նշելով այն որպես տեխնոլոգիական կարեւորագույն կենտրոն Հայաստանում։