photo © Թումո
photo © Թումո Ստուդիաներ

Թումո ստուդիաները նշել է 8-րդ տարեդարձը վերականգնված պատմական շենքում

Հունիսի 8-ին Թումոյի՝ արհեստագործությանը եւ դիզայնին նվիրված նախագիծը՝ Թումո ստուդիաները համատեղել է իր հիմնադրման ութամյակի տոնակատարությունը եւ նորամուտը Արամի 44 հասցեում գտնվող հուշարձան շենքում։

Ճարտարապետական յուրահատկությունների մանրակրկիտ պահպանությամբ վերանորոգված պատմական շենքում տեղի է ունեցել Թումո ստուդիաների ուսանողական աշխատանքների ցուցադրությունը։

Թումո ստուդիաները հիմնադրվել է 2017 թվականին։ Նախագիծը տրամադրում է անվճար կրթություն տասնութից բարձր տարիքի երիտասարդներին արհեստների եւ դիզայնի ոլորտներում՝ ասեղնագործություն, հագուստի կոնստրուկտավորում եւ մոդելավորում, զարդերի պատրաստում, խեցեգործություն, մաղատպագրություն, պրոդուկտ դիզայն եւ այլն։

Թումո ստուդիաներում արհեստները միահյուսվում են ժամանակակից դիզայնի ու ավանդական աշխատանքային տեխնիկաների հետ՝ ստեղծելով բարձրորակ եւ միջազգային շուկայում մրցունակ արտադրանք։

«Թումոն մշտապես կարեւորում է թե՛ նյութական, թե՛ ոչ նյութական մշակութային ժառանգության պահպանումը եւ արժեւորումը՝ որպես ստեղծարարության եւ նորարարական մտածողության նախապայման։ Այդ պատճառով ուրախ եմ, որ Թումո ստուդիաների նոր տունը հենց այս նշանավոր պատմական շենքում է։ Վստահ եմ, որ պատմությամբ ու արվեստով լեցուն այս հարմարավետ տարածքում ուսանողները կգտնեն ոգեշնչման անսպառ աղբյուր եւ կստեղծեն իսկապես արժեքավոր գործեր», - նշել է Թումոյի գործադիր տնօրեն Մարի Լու Փափազյանը։

photo © Թումո Ստուդիաներ

Երկար տարիներ Պուշկինի 38 հասցեում գործելուց հետո Թումո ստուդիաները տեղափոխվեց Արամի 44՝ Տերյան եւ Արամի փողոցների անկյունում՝ 1910-ականներին սեւ տուֆով կառուցված, պատմամշակութային հուշարձան հանդիսացող շենք։ Տարիների ընթացքում այս շենքը ծառայել է որպես կրթական օջախ՝ հյուրընկալելով կոմպոզիտոր Ռոմանոս Մելիքյանի երաժշտական ստուդիան, որը հետագայում դարձել է Երեւանի պետական կոնսերվատորիայի հիմքը։ Այստեղ են գործել նաեւ Հայկական պետական մանկավարժական հեռակա ինստիտուտը եւ ԳԱԱ-ի Փիլիսոփայության, սոցիոլոգիայի եւ իրավունքի ինստիտուտը։ Այսպիսով՝ Արամի 44-ը ներկայացնում է կրթության եւ մշակույթի ոլորտներում ստեղծագործական գործունեության շարունակական ժառանգությունը։

Նոր տարածքը նախատեսված է ընդլայնված ծրագրի համար, այն հնարավորություն է ընձեռում 1000-ից ավելի ուսանողի մասնակցել աշխատարանների, համագործակցելու ոլորտի լավագույն մասնագետների հետ եւ զարգացնելու սեփական նախագծերը։

Տրամադրելով տեխնիկական դասընթացներ եւ դիզայն աշխատարաններ՝ զարդերի պատրաստումից եւ խեցեգործությունից մինչեւ նորաձեւություն եւ ասեղնագործություն, Թումո ստուդիաները բաց է 18-ից 28 տարեկան բոլոր ցանկացողների համար: Ստուդիաների ուսանող դառնալու համար անհրաժեշտ է լրացնել հայտադիմում՝ tumostudios.com կայքում, ընտրելով ցանկալի դասընթացը կամ աշխատարանը։