Մեկնարկել է Yandex Armenia-ի Ծրագրավորման դպրոցի ընդունելությունը

Մեկնարկել է Yandex Armenia-ի Ծրագրավորման դպրոցի նոր ուսումնական տարվա ընդունելությունը:

Ծրագրի շրջանակում ուսուցանվելու են ծրագրավորման հիմունքները Python լեզվով՝ ներառյալ հիմնական հասկացությունները, կառուցվածքներն ու գրադարանները։ Դպրոց կարող են ընդունվել 14-17 տարեկան աշակերտներ։ Ընդունելությունը իրականացվում է թեստավորման արդյունքներով։

Այս տարի դասերը կանցկացվեն Վանաձորում եւ Գյումրիում՝ առկա ձեւաչափով, շաբաթը երկու անգամ, յուրաքանչյուր դասը՝ մեկուկես ժամ տեւողությամբ։ 

Դպրոց ընդունվածների համար ուսուցումն ամբողջությամբ անվճար է։ 

Ընդունելությունը բաղկացած է երկու փուլից՝ թեստավորում եւ հարցազրույց։ 

Առաջին հերթին հարկավոր է լրացնել մասնակցության հայտը https://codingschool.yandex.com.am կայքում։ Դրանից հետո դիմորդը նամակ կստանա՝ թեստավորման հղումով։ Եթե դիմորդը մինչեւ սեպտեմբերի 18-ը ներառյալ հաջողությամբ անցնի թեստը, նրան հարցազրույցի կհրավիրեն։

Yandex Ծրագրավորման դպրոցը միջազգային նախագիծ է, որն ուղղված է 14-17 տարեկան դպրոցականներին Python լեզվով ծրագրավորման հիմունքների ուսուցմանը, Հայաստանում ծրագիրն իրականացվում է 2017 թվականից ։ 

8 տարվա ընթացքում ծրագրի շրջանավարտ է դարձել ավելի քան 450 աշակերտ, որոնցից շատերը կապել են իրենց կյանքը տեղեկատվական տեխնոլոգիաների հետ։