Alphabet-ը, Amazon-ը, Meta-ն և Microsoft-ը 2026-ին $650 մլրդ կծախսեն AI-ի վրա

Alphabet-ը, Amazon-ը, Meta-ն և Microsoft-ը 2026 թվականին արհեստական բանականության «մրցավազքի» վրա միասին կծախսեն 650 միլիարդ դոլար։

Bloomberg-ը հաղորդում է, որ գումարների ապշեցուցիչ հոսքը կօգտագործվի նոր տվյալների կենտրոնների և դրանց շահագործման համար անհրաժեշտ սարքավորումների, այդ թվում՝ չիպերի համար։ Ընդհանուր առմամբ, ծախսերը 2025 թվականի համեմատ կավելանան մոտ 60%-ով։

«Այս չորս ընկերություններն արհեստական բանականության հաշվարկներ ապահովելու մրցավազքը համարում են նոր «հաղթողը վերցնում է ամեն ինչ» շուկա։ Եվ նրանցից ոչ մեկը պատրաստ չէ պարտվել»,- նշել է DA Davidson-ի վերլուծաբան Գիլ Լուրիան:

Meta-ի կապիտալ ծախսերը 2026 թվականին կկազմեն մոտավորապես 135 միլիարդ դոլար, ինչը տարեկան 87%-ով ավելի է։ Microsoft-ը նախատեսում է մինչև 2026 թվականի հունիսը ծախսել 105 միլիարդ դոլար (66%-ով ավելի)։ Alphabet-ի ծախսերը կհասնեն 185 միլիարդ դոլարի, ինչը կրկնակի ավելի է, քան 2025 թվականի ծախսերը։ Amazon-ը 2026 թվականի համար ունի ամենամեծ նախատեսված կապիտալ ծախսերը՝ մոտ 200 միլիարդ դոլար (տարեկան 50%-ով ավելի):

Ավելին, Bloomberg-ի տվյալներով՝ այս տարի ամերիկյան խոշորագույն ավելի քան 20 ընկերություն, այդ թվում՝ ավտոարտադրողներ ու բջջային օպերատորներ միասին կծախսեն մոտ 180 միլիարդ դոլար: Դրանց թվում են, օրինակ, Walmart-ը, ExxonMobil-ը և Intel-ը:

Մեծ տեխնոլոգիական ընկերությունների ծախսերը հիմնված են այն համոզմունքի վրա, որ արհեստական բանականությամբ աշխատող վերջնական արտադրանքն ապագայում կապահովի էքսպոնենցիալ ավելի բարձր եկամուտ:

Միևնույն ժամանակ, ներդրողները զգուշավոր են կապիտալ ծախսերի աճի ֆոնին՝ չնայած հանգամանքին, որ ընկերությունների հիմնական բիզնեսները, այդ թվում՝ գովազդը և էլեկտրոնային առևտուրը, մնում են կայուն և ստեղծում են կանխատեսումները գերազանցող շահույթ: