-
-
Իլյա Զոլինը
-
-
-
-
-
-
-
-
-
-
-
-
-
-
16:00 | 27.05.25 | Նորություններ | exclusive 1547
Հայաստանը՝ Axellect-ի տեխնոլոգիական հենակետը տարածաշրջանում
Axellect-ը Հայաստանում զարգացնում է տեխնոլոգիական ծառայությունների միջազգային ցանցը՝ վստահելով տեղական ներուժին։
Ընկերության պատմությունը հիմնված է ավելի քան 30 տարվա փորձի վրա՝ որպես միջազգային խորհրդատվական հսկա Accenture-ի մաս, որն իրականացրել է ավելի քան 3000 նախագիծ: Օրերս այն պաշտոնապես ազդարարեց Հայաստանում ներկայություն հաստատելու մասին։
Axellect Հայաստանի գլխավոր գործադիր տնօրեն Իլյա Զոլինը Accenture-ին միացել է դեռեւս 2004 թվականից։ Itel.am-ի հետ զրույցում նա պատմել է, որ Հայաստանի հետ անձնական կապը ձեւավորվել է 2016 թվականին, երբ Երեւանում վազել է իր առաջին կիսամարաթոնը․
«Ես սիրահարվեցի երկրին։ Շատ հաճախ եմ եղել Հայաստանում՝ թե՛ անձնական, թե՛ գործնական պատճառներով։ Այստեղ առաջին հերթին գնահատում եմ մարդկանց եւ հյուրընկալությունը, անկեղծությունն ու օգնելու պատրաստակամությունը»։
Իլյա Զոլինը
Axellect-ն այժմ գործում է մի քանի երկրում՝ Ղազախստանում, Արաբական Միացյալ Էմիրություններում եւ Սաուդյան Արաբիայում: Հայաստանը հատուկ տեղ է զբաղեցնում ընկերության ռազմավարությունում:
«Հայաստանը եզակի երկիր է՝ բարձրակարգ մասնագետներով, հատկապես՝ ՏՏ ոլորտում։ Միջազգային հաճախորդներին այլեւս պետք չէ բացատրել՝ ինչու Հայաստան։ Երկրի աշխարհագրական դիրքը լրացուցիչ առավելություն է՝ կապելով Եվրոպան, Ասիան եւ Մերձավոր Արեւելքը»,- նշում է Իլյա Զոլինը:
Ըստ նրա՝ ընկերությունը չի սահմանափակում տարբեր գրասենյակների գործունեությունը աշխարհագրական սկզբունքով։
«Բոլոր գրասենյակները միավորված են միասնական ռազմավարության ներքո եւ մատուցում են նույն end-to-end ծառայությունները՝ սկսած բիզնես խորհրդատվությունից մինչեւ ՏՏ ճարտարապետություն, հատուկ լուծումների իրականացում, համակարգերի ներդրում եւ դրանց սպասարկում»,- բացատրում է Իլյա Զոլինը։
Axellect-ի հիմնական գործընկերները խոշոր ընկերություններ են՝ ֆինանսական (բանկեր եւ ապահովագրական ընկերություններ), արագ սպառման ապրանքների, մանրածախ առեւտրի եւ արդյունաբերական ոլորտներից։ Axellect-ի գլխավոր տնօրենը վստահ է՝ հայկական ՏՏ ոլորտն արդեն հասուն փուլում է, սակայն դեռ ունի զգալի աճի պոտենցիալ․
«ՏՏ-ն արդեն էական մաս է կազմում Հայաստանի տնտեսությունում, սակայն դեռ զարգացնելու տեղ կա։ Հատկապես՝ արհեստական բանականության համաշխարհային բումի պայմաններում մեծ հնարավորություն կա բազմապատկելու Հայաստանի դերը գլոբալ շուկաներում»։
Ներկայում Axellect-ի հայկական գրասենյակն ունի 40 աշխատակից, սակայն առաջիկայում ընկերությունն ակնկալում է ընդլայնել թիմը՝ մասնագետների թիվը հասցնելով մի քանի հարյուրի։
«Մենք փնտրում ենք մասնագետների, որոնք տեխնոլոգիական գիտելիքներին զուգահեռ ունեն բիզնես մտածողություն։ Կարեւոր է նորագույն տեխնոլոգիաների կիրառման հմտությունն իրական բիզնես մարտահրավերների լուծման համար։ Մեր կորպորատիվ մշակույթում ընդունված է բաց լինելը, նորարարությունն ու ձեռնարկատիրական ոգին։ Դրա հետ մեկտեղ՝ ավելի արագ ենք որոշումներ կայացնում եւ գործում»,- եզրափակում է Իլյա Զոլինը։
Ընկերության գլոբալ թիմում ներկայում 2000-ից ավելի մասնագետ է աշխատում, եւ հայկական գրասենյակը միանում է գլոբալ ցանցին՝ իր ուրույն տեղը զբաղեցնելով ընկերության միջազգային զարգացման ծրագրերում:
Նունե Գրիգորյան
Լուսանկարները՝ Ագապե Գրիգորյանի
14:47 | 27.05.25 |
Նորություններ
ftNFT ֆիջիթալ սփեյսում նշվել է Բիթքոին-պիցցայի օրը
11:15 | 27.05.25 |
Նորություններ
Sevan Startup Summit 2025-ն ընդունում է ստարտափների հայտեր
