«Արհեստական բանականության անատոմիա». կայացել է Silicon Mountains 2025 գագաթնաժողովը

Երեւանում կայացավ «Արհեստական բանականության անատոմիա» խորագրով Silicon Mountains 2025 գագաթնաժողովը, որը դարձել է երկրի առանցքային տեխնոլոգիական հարթակը: 

Միջոցառումը միավորել էր առաջատար փորձագետներին եւ ոլորտի առաջնորդներին՝ ցույց տալու, թե ինչ կառուցվածք ունի արհեստական բանականությունը՝ ալգորիթմներից եւ նեյրոնային ցանցերից մինչեւ տվյալների հոսքեր եւ մարդկային փորձառության դերը թվային փոխակերպման մեջ:

ՏՀՏ գործատուների միության գործադիր տնօրեն Էդուարդ Մուսայելյանն ընդգծել է, որ գագաթնաժողովն անցկացվում է արդեն իններորդ անգամ, իսկ վերջին երկու տարիներին միջոցառումներն առաջին անգամ անցկացվել են նաեւ մարզերում՝ Գյումրիում եւ Լոռիում: «Ձեւաչափը, երբ տարվա ընթացքում մեկ միջոցառումն անցկացվում է մայրաքաղաքում, իսկ մյուսը՝ մարզերում, հնարավորություն է տալիս նորարարությունները տարածել ամբողջ երկրի տարածքում: Մենք կարծում ենք, որ տեխնոլոգիաները պետք է հասանելի լինեն յուրաքանչյուր համայնքի, յուրաքանչյուր դպրոցի եւ յուրաքանչյուր երիտասարդի համար», - ասել է նա: 

Մուսայելյանն ընդգծել է, որ ավագ դպրոցներում արհեստական բանականության դասավանդման STEP.ai ծրագրի մեկնարկի կարեւորությունը՝ նշելով, որ ծրագիրը 2024թ. հոկտեմբերից իրականացվում է երկրի 15 դպրոցներում:

Ծրագրի շրջանակում երեք տարվա ընթացքում աշակերտները խորությամբ ուսումնասիրում են արհեստական բանականությունը՝ սկսելով հիմունքներից։ 10-րդ դասարանում նրանք սովորում են ծրագրավորում Python լեզվով, որը հնարավորություն է տալիս կառավարել համակարգիչները։ 11-րդ դասարանում նրանք ուսումնասիրում են մեքենայական ուսուցում, իսկ 12-րդ դասարանում արդեն կառուցում են իրական ռոբոտներ։ 

Գագաթնաժողովին մասնակցում էին աշխարհահռչակ մասնագետներ եւ փորձագետներ՝ Analog Devices-ի գլխավոր գործադիր տնօրեն, Բարձր տեխնոլոգիաների ոլորտում համաշխարհային ներդրման համար ՀՀ պետական մրցանակի 2025թ. դափնեկիր Վինսենթ Ռոշը, Flagship Pioneering-ի հիմնադիր եւ Moderna-ի համահիմնադիր Նուբար Աֆեյանը, Հյուսիսային Ասիայի McKinsey & Company-ի պատվավոր նախագահ Անդրե Անդոնյանը, Nokia-ի Կենտրոնական եւ Հարավային Եվրոպայի տեխնիկական տնօրեն Իվան Լեսիչը, տեխնոլոգիական ձեռնարկատեր եւ գինեգործ Ադամ Կաբլանյանը, Cognaize-ի հիմնադիր Վահե Անդոնյանսը եւ ոլորտի այլ առաջնորդներ: Նրանք կիսվել են իրենց անձնական փորձով եւ քննարկել արհեստական բանականության ապագան, գեներատիվ մոդելները, տվյալների կառավարումը եւ մարդկային փորձառության դերը: